Foto nga: USAID/Shqipëri   Një grua afariste bisedon me një specialist të QKR-së rreth aplikimit për regjistrimin e biznesit të saj. Sapo të miratohet kërkesa e saj, ajo do të regjistrohet automatikisht në departamentet përkatëse në bashki, në Drejtorinë e Tatimeve, në Sigurimet Shoqërore, në Sigurimin Shëndetësor dhe në Inspektoriatin e Punës.

Regjistrimi i Biznesit në Shqipëri: Më i thjeshtë, më i lirë, më i lehtë

Regjistrimi i Biznesit në Shqipëri: Më i thjeshtë, më i lirë, më i lehtë
Inaugurohet Qendra Kombëtare e Regjistrimit në Tiranë

Tiranë, 10 shtator 2007 – Komuniteti i biznesit në Shqipëri ka arsye për të festuar sot. Qeveria e Shqipërisë, me përkrahjen e Llogarisë së Sfidës së Mijëvjeçarit, hapi sot Qendrën Kombëtare të Regjistrimit (QKR), e cila u mundëson bizneseve të regjistrohen brenda një dite të vetme dhe vetëm në një zyrë.

Gjatë fjalimit në ceremoninë e hapjes zyrtare të QKR-së, Kryeministri, Z. Sali Berisha, tha se “kjo qendër zgjeron liritë ekonomike të individit” për bizneset në Shqipëri.

Duke vizituar QKR-në në Tiranë ose një nga sportelet e shërbimit të kësaj Qendre në bashki, shqiptarët mund të regjistrojnë bizneset e tyre, të marrin një numër identifikimi për tatimpaguesin (NIPT) dhe njëkohësisht të regjistrohen edhe për sigurimet shoqërore e shëndetësore.  

Ambasadori i ri i SHBA në Shqipëri, z. John L. Withers II (Xhon L. Uidhërs), theksoi faktin se ishte pikërisht partneriteti ndërmjet Qeverisë së Shqipërisë dhe projektit të Sfidës së Mijëvjeçarit për Shqipërinë që bëri të mundur krijimin e QKR-së dhe inkurajoi shqiptarët të përfitojnë nga procedurat e reja të regjistrimit të biznesit. 

“Korporata e Sfidës së Mijëvjeçarit (KSM) është e kënaqur që përpjekjet tona të përbashkëta bënë të mundur këtë ditë të rëndësishme për përmirësimin e klimës së biznesit në Shqipëri,” tha znj. Maria Longi, Drejtore e Programeve të Pragut të KSM. “Ne do të vazhdojmë të mbështesim reformat në fushën e regjistrimit të biznesit, si dhe në fushat e mbuluara nga dy komponentët e tjerë të projektit, që janë administrata tatimore dhe prokurimi publik, si dhe pjesëmarrjen e komunitetit të biznesit në këto reforma.” 

Z. Berisha, Ambasadori Withers dhe Znj. Longi prenë shiritin e inaugurimit dhe vizituan zyrat e QKR. Ata përgëzuan përfaqësues të disa kompanive që dorëzuan aplikimin për regjistrim ditën e premte, datë 7 shtator, dhe e kryen regjistrimin brenda një dite. Z. Berisha i uroi atyre suksese në sipërmarrjen e re të kompanive përkatëse.

Krijimi i Qendrës Kombëtare të Regjistrimit është pjesë e reformave të administratës publike në Shqipëri, mbështetur nga Marrëveshja Prag e Sfidës së Mijëvjeçarit për Shqipërinë ndërmjet qeverisë së SHBA dhe qeverisë shqiptare, administruar nga USAID-i. Marrëveshja Prag për Shqipërinë asiston Qeverinë e Shqipërisë në reformimin dhe modernizimin e administratës tatimore, prokurimit publik dhe regjistrimit të biznesit, si dhe në krijimin e një sistemi të integruar nëpërmjet metodave më të fundit të qeverisjes elektronike. 

# # #