Foto nga: USAID Shqipëri   Ambasadori i Sh.B.A.-së në Shqipëri, John L. Withers, II, mbajti fjalën e rastit në ceremoninë e nënshkrimit të Marrëveshjeve të Mirëkuptimit me institucionet kryesore gjyqësore për të mbështetur gjykata më të përgjegjshme.

USAID do të Mbështesë Gjykata më të Përgjegjshme, Trasparente, dhe Efikase

USAID DO TË MBËSHTESË GJYKATA MË TË PËRGJEGJSHME, MË TRANSPARENTE DHE MË EFIKASE

QEVERIA SHQIPTARE, AUTORITETET GJYQËSORE SHQIPTARE DHE USAID-I SINJALIZOJNË ANGAZHIM PËR REFORMËN NË DREJTËSI NËPËRMJET NËNSHKRIMIT TË NJË MARRËVESHJEJE MIRËKUPTIMI

TIRANË, 28 JANAR 2008– Agjencia e Shteteve të Bashkuara për Zhvillim Ndërkombëtar (USAID) nënshkroi një Marrëveshje Mirëkuptimi me Ministrinë e Drejtësisë, Këshillin e Lartë të Drejtësisë dhe autoritetet e tjera kombëtare gjyqësore, për të përmirësuar cilësinë e drejtësisë në Shqipëri dhe për të fituar besimin e publikut tek gjykatat dhe tek institucionet e tjera publike. 

Marrëveshja e Mirëkuptimit u nënshkrua nga Drejtori i Misionit të USAID-it në Shqipëri, z. Edward T. Landau, Ministri i Drejtësisë, z. Enkelejd Alibeaj, Nënkryetari i Këshillit të Lartë të Drejtësisë, z. Kreshnik Spahiu, Kryetari i Gjykatës së Lartë dhe Kryetari i Konferencës Gjyqësore Kombëtare, z. Thimjo Kondi dhe Drejtoresha Ekzekutive e Zyrës së Administrimit të Buxhetit Gjyqësor, znj. Luljeta Laze. Ambasadori i Shteteve të Bashkuara, John L. Withers II mbajti fjalën përshëndetëse në këtë ceremoni.

Siç thuhet dhe në Marrëveshje, qëllimi i Programit të Shtetit Ligjor është jo vetëm të përmirësojë transparencën, efektivitetin dhe përgjegjshmërinë në Gjykatat Pilote, por edhe të demonstrojë për gjykatat në të gjithë Shqipërinë standarde të larta dhe parimet e punës së tyre në fushat e (a) transparencës, aksesit dhe hapjes ndaj publikut, (b) përgjegjshmërisë dhe pavarësisë së duhur, (c) kompetencës, paanshmërisë dhe etikës, (d) respektimit të afateve kohore, si dhe (e) besimit të publikut.

Projekti do të asistojë 10 Gjykata Pilote. Asistenca do të përfshijë aktivitete të tilla si futjen e sistemeve të regjistrimit për mbajtjen më të saktë të procesverbaleve gjyqësore; krijimin ose përmirësimin e faqeve të internetit të gjykatave me informacion rreth aktivitetit të gjykatës; botimin e vendimeve gjyqësore ne kopje elektronike dhe fizike; përmirësimin e sistemit të arkivave gjyqësore, standardeve dhe procedurave që kanë lidhje me to; zbatimin e një strategjie për përfshirjen e publikut; vendosjen e standardeve dhe strukturave për t’iu përgjigjur kërkesave të publikut dhe të mediave; vendosjen e standardeve të punës për gjykatat; shkurtimin e vonesave gjatë gjykimit dhe sistemet për hedhjen e shortit; zgjerimin e aksesit të gjyqtarëve në aktet ligjore dhe rregulloret nëpërmjet përdorimit të bazave të të dhënave; asistencë për përdomin e sistemit elektronik të manaxhimit të çështjeve; si dhe trajnim në fushat e efikasitetit, përgjegjshmërisë dhe transparencës.

# # #