USAID-i hap katër vende të reja pune

TIRANË, 15 maj 2009     Sot, Agjencia e Shteteve të Bashkuara për Zhvillim Ndërkombëtar njoftoi hapjen e katër vendeve të reja pune në zyrat e Programit, të Shëndetësisë dhe të Menaxhimit. USAID-i ka punuar në Shqipëri që prej vitit 1992. Ky është shtimi më i madh brenda një viti që prej hapjes së zyrave të agjencisë në Shqipëri. Aktualisht USAID/Shqipëri punëson një personel prej 18 shqiptarësh.

“USAID-i është i kënaqur që do të mund të sjellë në agjenci personel të ri”, - tha Drejtori i përkohshëm i Misionit, Xhon Branaman. – ”Ne e dimë se ka shumë shqiptarë të talentuar dhe me përvojë që do të kontribuojnë pozitivisht në zhvillimin e programeve tona dhe në zgjerimin e mëtejshëm në të ardhmen”.

Qeveria e Sh.B.A.-së, përmes USAID-it, ka ofruar më shumë se 438 milionë dollarë asistencë në mbështetje të demokracisë, të mirëqenies dhe të sigurisë në Shqipëri.

USAID/Shqipëri, drejtuar prej Roberta Mahonit, zbaton programe për të nxitur rritjen ekonomike dhe për të ulur varfërinë, për të forcuar institucionet demokratike dhe shoqërinë civile, për të përmirësuar sistemin gjyqësor dhe për të zvogëluar korrupsionin, për të rritur eficiencën e sistemit të kujdesit shëndetësor parësor, si dhe në synimin e nismave të veçanta përfshirë energjetikën dhe trafikimin njerëzor.

Për më shumë informacion mbi këto njoftime, lutemi të vizitoni faqen e internetit të USAID/Shqipëri: http://albania.usaid.gov ose të dërgoni email në adresën e kontaktit të faqes së internetit: tirana-webcontact@usaid.gov