Në ditën e zgjedhjeve, më shumë se tre qind vëzhgues të trajnuar do të veshin bluza dhe kapele në ngjyrë të verdhë të ndezur dhe do të mbajnë në duar pajisje të komunikimit në distancë.

Mbështetje për zgjedhjet parlamentare 2009 në Shqipëri

Monitorimi në periudhën parazgjedhore
Për të mësuar se si qytetet dhe organizatat e shoqërisë civile po organizohen për zgjedhjet e qershorit, Seksioni Politik dhe Ekonomik i Ambasadës së Sh.B.A.-së po dërgon zyrtarë të tij nëpër qytet e Shqipërisë. Gjatë këtyre udhëtimeve, zyrtarët takohen me nëpunësit e qeverisë, drejtues të partive politike, OJF-të, kontakte biznesi, studentë universitarë, si dhe me grupe të tjera, në mënyrë që të përftojnë në mënyrë të drejtëpërdrejtë një pamje sa më të qartë të përgatitjeve të zgjedhjeve.

Monitorimi i Medias
USAID-i po sponsorizon monitorim përmes OJF-ve të mbulimit nga ana e televizioneve dhe e medias së shkruar gjatë 45 ditëve të fushatës përpara zgjedhjeve të 28 qershorit. Organizata shqiptare që do të monitorojë median do të përdorë një sistem të fjalës së fundit të teknologjisë, i cili mat kohëzgjatjen e transmetimit dhe gjerësinë e kolonave në median e shkruar për mbulimin e zgjedhjeve për çdo parti politike. Metodologjia e përdorur do të lejoje që OJF-të të gjurmojnë anshmëritë dhe favorizimin në mbulimin mediatik, pasi kjo e lejon median të ndërmarrë përshtatjen e duhur gjatë fushatës për të siguruar një mbulim të barabartë për subjektet elektorale dhe për të shmanguar anshmëritë. Ajo do të shpërndajë raporte javore mbi gjetjet e tyre, të cilat do t’i shpërndahen publikut përmes konferencave për shtyp.

Rezultatet Direkte të Zgjedhjeve
Për herë të parë në Shqipëri, përmes mbështetjes së USAID-it, në ditën e zgjedhjeve do të transmetohen Rezultatet jopartiake Direkte të Zgjedhjeve, të cilat do të raportojnë në kohë reale rezultatet paraprake nga të 66-të qendrat e numërimit të votave, përgjatë gjithë procesit të numërimit. Në ditën e zgjedhjeve, më shumë se tre qind persona të trajnuar për të numëruar votat do të vishen me bluza dhe me kapele në ngjyrë të verdhë të ndezur dhe do të mbajnë në duart e tyre pajisje të lëvizshme që lejojnë tranmetimin e të dhënave në distancë pa tel (GPRS) për të komunikuar rezultate në kohë reale nga qendrat e numërimit në selinë qendrore në Tiranë, ku rezultatet do të konfirmohen, do të sistemohen dhe do të raportohen në një qendër të veçantë mediatike dhe do të publikohen në faqen e internetit të Rezultateve Direkte të Zgjedhjeve.

Komisioni Qendror i Zgjedhjeve
Sh.B.A.-ja po i ofron asistencë teknike Komisionit Qendror të Zgjedhjeve (KQZ) në Shqipëri për të zhvilluar një fushatë për informimin e publikut, duke u shpjeguar votuesve procedurat e reja të votimit dhe kartat e identitetit për votim, si dhe duke i nxitur votuesit që të votojnë në ditën e zgjedhjeve. Ndihma do të përfshijë gjithashtu, prodhimin e një videoje trajnuese dhe të materialeve të tjera për të gjithë komisionerët zgjedhorë, për t’u siguruar që personeli i rekrutuar të kryejë përgjegjësinë e tyre civile në këto zgjedhje të kuptojë procedurat e reja të votimit. Sh.B.A.-ja do të mbikëqyrë dhe do të testojë gjithashtu, sistemin e ri të monitorimit të numërimit dhe të raportimit paraprak të rezultateve. USAID-i do të ofrojë ekspertizë në fushën e teknologjisë së informacionit, për t’u siguruar që sistemi është instaluar në mënyrën e duhur dhe është tërësisht operacional përpara ditës së zgjedhjeve.

Mbështetje për Shoqërinë Civile
Shoqëria civile në Shqipëri luan një rol jetik në sigurimin e integritetit të zgjedhjeve parlamentare të 28 qershorit 2009. Për këtë arsye, Komisioni për Demokracinë në Ambasadën e Sh.B.A.-së në Tiranë po mbështet përpjekjet për monitorimin vendor të zgjedhjeve, që përfshin një organizatë ombrellë përbërë prej disa OJF-ve shqiptare, të cilat do të trajnojnë dhe do të mobilizojnë më shumë se dy mijë vëzhgues të instaluar në qendrat në Ditën e Zgjedhjeve, gjatë së cilës ata do të monitorojnë proceset e votimit dhe të numërimit të votave.

Grantet e Komisionit të Demokracisë                    

• Grupi i Gazetarëve Shqiptarë
• Komiteti Shqiptar i Helsinkit
• Instituti Shqiptar për Zhvillimin e Sistemit Zgjedhor (AIESD)
• Lëvizja Evropiane në Shqipëri (EMA)
• Qendra Kombinat Për Gratë dhe Fëmijë
• Instituti për Gratë dhe Zhvillimin e Alternativave (IWDA)
• KRIIK-Shqipëri
• "Mjaft"
• Shoqëria për Kulturë Demokratike (SDC)
• Partnerët-Shqipëri, Qendra për Ndryshim dhe Menaxhim Konflikti

Grupi i Punës për Zgjedhjet
Në këtë takim dy javor, i cili së shpejti do të mblidhet çdo javë, marrin pjesë të gjitha ambasadat dhe organizatat multilaterale të përfshira në ofrimin e asistencës gjatë periudhës së zgjedhjeve të 28 qershorit në Shqipëri. Drejtuar nga OSBE-ja dhe USAID-i, grupi përfshin zyrtarë të qeverisë, të cilët luajnë rol të rëndësishëm në administrimin e zgjedhjeve. Qëllimi i grupit është që të koordinojë asistencën e donatorëve dhe të shmangë dublikimin e saj, si dhe të ofrojë një medium për të komunikuar rreth statusit të përgatitjes së zgjedhjeve mes anëtarëve të komunitetit ndërkombëtar dhe të zyrtarëve zgjedhorë në Shqipëri. Ky grup është krijuar që prej vitit 2004 dhe ka funksionuar në këtë formë gjatë tri proceseve zgjedhjeve të rradhës.