Foto nga: Creative Associates   (Majtas) Sekretaja e Shtetit, Zj. Klinton, duke prezantuar Raportin mbi Trafikimin Njerëzor-2009.

Grantmarrësja e KVKTNj-së së USAID-it nderohet nga Sekretarja e Shtetit, Zj. Klinton

Një grantmarrëse e USAID-it, Vera Lesko, e Qendrës "Vatra" në Shqipëri, u nderua sot nga Sekretarja e Shtetit, Zj. Hillary Rodham Klinton, gjatë publikimit të Raportit të Departamentit të Shtetit mbi Trafikimin në Njerëz  2009.

Znj. Lesko, një pioniere në luftën kundër trafikimit të qenieve njerëzore në Shqipëri, ishte një nga nëntë Heronjtë e Luftës kundër Trafikimit Njerëzor të njohur nga Sekretarja e Shtetit.

Sekretarja e Shtetit, Klinton, nënvizoi historinë e Znj. Lesko duke vënë në dukje se: "Angazhimi i saj në punën e vet ka pasur kosto dhe rreziqe. Vera është sulmuar dhe rrahur disa herë nga ata njerëz që përfitojnë nga tregtia e paligjshme e grave dhe e vajzave. Madje, asaj i duhej ta dërgonte të bijën për të jetuar jashtë vendit për sigurinë e saj. Por, asgjë nuk e ndaloi Verën të vazhdonte të përkrahte e të mbronte gratë dhe vajzat e Shqipërisë dhe të drejtën e tyre për të jetuar në paqe dhe siguri". Qëndra Vatra është organizata e parë në Shqipëri që punoi me viktimat e trafikimit të qenieve njerëzore.

Që prej vitit 2004, USAID-i ka mbështetur Znj. Lesko dhe stafin e saj me grante dhe me ngritje të kapaciteteve nëpërmjet programit Nisma Shqiptare: Koordinimi i Veprimeve Kundër Trafikimit Njerëzor (KVKTNj). KVKTNj ka financuar 22 organizata vendore për të zbatuar më shumë se 40 projekte mbi luftën ndaj trafikimit të grave dhe të fëmijëve shqiptarë.

Puna e Znj. Lesko filloi në Vlorë, një qytet prej 60,000 banorësh në jugperëndim të Shqipërisë dhe një portë e madhe kalimi për trafikantët të cilët i transportojnë viktimat e tyre me traget për në portet italiane. Pas kryerjes së 500 intervistave me politikanë, përfaqësues të komunitetit dhe vajza të trafikuara, Znj. Lesko arriti në përfundimin tronditës se trafikimi njerëzor praktikohej gjerësisht në Vlorë. Ajo filloi të mbështesë në mënyrë të drejtëpërdrejtë raste të izoluara që ishin viktima të trafikimit. Njëherë një trafikant vendas, të cilin ajo e kishte raportuar në polici, e ndoqi deri në shtëpi duke e kërcënuar se do të trafikonin vajzën e vetë Znj. Lesko nëse ajo nuk do të tërhiqte padinë e saj.

Charito Kruvant, Presidente e Creative dhe CEO, tha: "Vera është një udhëheqëse e vërtetë kurajoze. Udhëheqja e saj, angazhimi deri në përsosmëri dhe përkujdesja kanë sjellë një ndryshim të vërtetë në jetën e grave dhe vajzave të cilat janë viktima apo synohen prej krimit të trafikimit të qenieve njerëzore.” 

Pasi mori çmimin prej Sektretares së Shtetit, Zj. Lesko tha: "Më vinte për të qarë. Në këto 12 vite kjo ka qene puna dhe gjaku im, e kjo ceremoni përfaqëson një arritje kurorëzuese".