Foto nga: Paul Cohn

Fillon punën Qendra Kombëtare e Licencimit

TIRANË, 9 qershor 2009 - Morën fund mungesa e informacionit, endjet pa fund nga një zyrë në tjerën, pirgu me dokumenta për t’u plotësuar dhe orët e gjata të harxhuara për të marrë një licencë, autorizim apo leje për biznesin tuaj!

Sipas ligjit të miratuar në shkurt të këtij viti, i cili reformon licencimin e biznesit në Shqipëri, ka filluar punën Qendra Kombëtare e Licencimit (QKL), një  institucion publik qendror në varësi të Ministrisë së Ekonomisë, Tregtisë dhe Energjetikës.

Sot, në ceremoninë e hapjes së zyrave qendrore të QKL-së në Tiranë, Kryeministri Berisha dhe Drejtoresha e Misionit e USAID-it, Roberta Mahoney, zbuluan një pllakë dedikimi që vlerëson ndihmën e popullit amerikan përmes Programit Prag të Koorporatës së Sfidës së Mijëvjeçarit II, në ngritjen e QKL-së. Duke shfrytëzuar zgjidhjet bashkëkohore që ofron teknologjia e informacionit, kjo Qendër funksionon në bazë të një sistemi elektronik, i cili automatizon procesin e licencimit dhe mundëson ndjekjen hap pas hapi të ecurisë së aplikimit.

Në fjalën e tij Kryeministri Berisha vuri në dukje angazhimin e vazhdueshëm të qeverisë shqiptare për ta bërë sa të lehtë aktivitetin e biznesit në Shqipëri.

Me shërbimin me një ndalesë dhe procedura të shkurtuara, transparente dhe të shpejta, QKL redukton barrierat administrative ndaj nismës së lirë, ul kostot për bizneset në procesin e licensimit dhe zvogëlon hapësirat për informalitet, duke përmirësuar ndjeshëm klimën për biznes në Shqipëri.

Faza e dytë e Programit Prag MCC Shqipëri është një marrëveshje dyvjeçare me vlerë
15.7 milion dollarë ndërmjet Shqipërisë dhe Shteteve të Bashkuara, e financuar nga Korporata e Sfidës së Mijëvjeçarit (MCC) dhe e administruar nga USAID, e cila ka për qëllim të forcojë shtetin ligjor, të reduktojë korrupsionin dhe të rrisë mbikëqyrjen nga publiku përmes zgjidhjeve të teknologjisë së informacionit dhe ndihmës teknike, duke përmirësuar kështu klimën për biznes në Shqipëri.