Foto nga: USAID/Shqipëri

Akreditohen Monitoruesit për Projektin “Rezultatet Direkte të Zgjedhjeve" të mbështetur nga USAID-i

TIRANË, 24 qershor 2009     Sot, kryetari i Komisionit Qendror të Zgjedhjeve, z. Arben Ristani, u akordoi akreditimin dy organizatave shqiptare që do të punojnë së bashku për të kryer numërimin e parë paralel të votave, të zhvilluar ndonjëherë në zgjedhjet e përgjithshme në Shqipëri.

Financuar prej Agjencisë së Shteteve të Bashkuara për Zhvillim Ndërkombëtar (USAID), Projekti “Rezultatet direkte të zgjedhjeve”  do të kryhet prej “Agjencisë së Administrimit të Zgjedhjeve” (ECA) dhe “KRIIK Albania”, të cilët kanë trajnuar 450 vëzhgues për të monitoruar procesin e numërimit të votave në 66 qendrat e numërimit në mbarë vendin.

Vëzhguesit, të veshur me bluza dhe me kapele në ngjyrë të verdhë të ndezur që bartin logon “e dy shenjave verifikuese” të numërimit paralel të votave, do të hedhin rezultatet nga secila fletë korresponduese votimi në një pajisje ndihmuese portabël dixhitale, e cila do të transmetojë rezultatet për shpërndarje, ndërsa ato mblidhen në mënyrë kumulative përgjatë procesit të numërimit të votave. Ndërkohë, rezultatet do të jepen përmes konferencave për shtyp dhe përmes publikimit në kohë reale në faqen e internetit: http://www.eca.al/.

Ambasadori i Sh.B.A.-së, z. Xhon Uidhërs II dhe Shefi i Prezencës së OSBE-së në Shqipëri, z. Robert Bosh, përgëzuan vëzhguesit lidhur me përkushtimin e tyre për zgjedhje të lira dhe të drejta. Ata lavdëruan gjithashtu KQZ-në për të qenit e hapur ndaj vëzhgimeve dhe vlerësuan përpjekjet e saj për ta përgatitur Shqipërinë për zgjedhjet parlamentare të 28 qershorit 2009.

Ambasadori i Sh.B.A.-së bëri dallimin mes numërimit paralel të votave prej numërimit zyrtar të votave, duke thënë se e para ka për qëllim “të vëzhgojë me kujdes dhe përpikmëri numërimin zyrtar të votave, të kontrollojë saktësinë e tij, të përforcojë besimin e publikut për rezultatet që do të dalin”. “Ndonëse është financuar prej Shteteve të Bashkuara”,- shtoi ai, - “votimi paralel i votave nuk  është një numërim amerikan i rezultateve [por] një numërim i pavarur i votave reale të votuara prej shqiptarëve realë”.