Foto nga: LGPA   Projekti i USAID-it për Qeverisjen Vendore botoi një manual për të ndihmuar bashkitë në menaxhimin në mënyrë më efektive të aseteve lokale. Duke vepruar kështu, bashkitë do të kenë mjetet për të rritur të ardhurat dhe për të përmirësuar shërbimet publike.

USAID-i ofron mjete për t’i ndihmuar bashkitë në menaxhimin e aseteve publike

TIRANË, 28 SHTATOR 2010   Projekti i USAID-it për Qeverisjen Vendore (LGPA) në bashkëpunim me Ministrinë e Brendshme dhe Institutin për Kërkime Urbane (IKU) organizoi sot një tryezë me përfaqësues nga njësitë e qeverisjes vendore, ministritë e linjës, si dhe grupet të tjera të interesit për prezantimin e një udhëzuesi të ri që do të ndihmojë qytetet të menaxhojnë asetet lokale.

Përgjatë viteve të fundit njësitë vendore në Shqipëri kanë qenë pjesë e procesit të inventarizimit dhe transferimit të të drejtave të pronësisë mbi asete lokale të cilat zotëroheshin më parë nga qeveria qëndrore. Qindra ndërmarje shtetërore, ish-reparte ushtarake, zyra, shkolla, rrugë dhe sheshe publike si dhe tokw urbane dhe pyje e kullota janë transferuar në pronësi të njësive vendore dhe kanë potencialin që të rrisin të ardhurat aq shumë të nevojshme nëpërmjet privatizimeve, dhënies me qera dhe partneriteteve publike private. Gjatë tre viteve të fundit programi i USAID-it për Qeverisjen Vendore ka ndihmuar njësitë vendore që të identifikojnë, inventarizojnë dhe të regjistrojnë qindra asete të cilat më pas janë hedhur në baza të dhënash që mund të menaxhohen lehtësisht nga punonjësit vendorë. USAID-i ka siguruar gjithashtu udhëzime se si mund të aplikohen metodat moderne të menaxhimit për të rritur të ardhurat dhe për të përmirësuar shërbimet publike.

Publikimi i sotëm pason Manualin për Menaxhimin e Aseteve të publikuar nga USAID-i në vitin 2009, i cili përqendrohej mbi legjislacionin përkatës dhe metodat për inventarizimin dhe krijimin e një regjistri vendor te aseteve. Publikimi i ri, “Udhëzuesi për Menaxhimin e Aseteve në Nivel Vendor”, do të jetë një instrument për të përmirësuar mënyrën se si njësitë vendore menaxhojnë këto asete për të përmirësuar shërbimet publike ndaj qytetarëve.

Programi i Qeverisjes Vendore në Shqipëri (LGPA) i Agjencisë së Shteteve të Bashkuara për Zhvillimin Ndërkombëtar (USAID) punon me dhjetë bashki në të gjithë Shqipërinë me qëllim që të mbështesë zhvillimin e ekonomisë vendore, të përmirësojë qeverisjen dhe të forcojë pjesëmarrjen e shoqërisë civile dhe sektorit privat në zhvillimin vendor. Bashkitë partnere të LGPA-së janë: Elbasani, Fieri, Fushë-Kruja, Gramshi, Korça, Kukësi, Lezha, Librazhdi, Pogradeci dhe Shkodra.