Foto nga: USAID/Shqipëri

Programi për Rindërtimin e Sektorit Energjetik

Kohëzgjatja:  Shtator 2000 - Shtator 2008 (mbyllur)

Partnerët: Pierce Atwood  
                Hunton & Williams   
                United States Energy Association   
                National Association of Regulatory Utility Commissioners

Fokusi gjeografik: Kombëtar

Përshkrimi:
Sistemi elektronergjetik shqiptar prodhon mbi 95% të energjisë elektrike nga burimet hidrike dhe për këtë arsye varet në një masë të madhe nga sasia e rënies së rreshjeve. Mungesa e investimeve në burimet e reja gjeneruese, mirëmbajtja e pamjaftueshme e pajisjeve ekzistuese dhe aftësia e kufizuar për import energjie, ka ulur ndjeshëm furnizimin me energji elektrike të Shqipërisë, ndërkohë që kërkesa është rritur. Këto probleme bashkohen me kapacitetin e dobët institucional për të realizuar reformat e nevojshme në sektorin elektroenergjetik dhe me menaxhimin joefikas të Korporatës shtetërore Elektronergjetike Shqiptare (KESH). Për rrjedhojë, Shqipëria vazhdon të përballet me kriza serioze energjie, të cilat kërcënojnë qëndrueshmërinë e rritjes së saj ekonomike. Në fakt, mungesa e furnizimit të sigurt dhe të përballueshëm të energjisë elektrike ka qenë njëri prej faktorëve që pengon rritjen e sipërmarrjeve shqiptare dhe shkurajon investimet e brendshme dhe të huaja.

Programi i USAID-it për energjinë siguron asistencë teknike dhe trajnim për të mbështetur zbatimin e strategjisë kombëtare për energjinë, që synon të stimulojë rritje ekonomike të qëndrushme dhe investime duke përmirësuar disponueshmërinë, eficiencën dhe sigurinë e furnizimit me energji elektrike me kosto të arsyeshme. Gjatë vitit 2006, USAID-i u përqendrua në forcimin e aftësisë së Entit Rregullator të Energjisë për të funksionuar si një ent rregullator energjie i pavarur dhe transparent, dhe ndihmoi qeverinë në zhvillimin e kuadrit ligjor për ngritjen e një tregu energjetik të hapur dhe eficient. USAID-i ndihmoi gjithashtu KESH-in në zhvillimin e kapaciteteve financiare dhe operacionale që të bëhet një pjesëmarrës i efektshëm në Komunitetin e Energjisë për Evropën Juglindore (ECSEE) dhe që të zbatojë ndarjen e aseteve të gjenerimit, të transmetimit dhe të shpërndarjes në kompani të pavarura, të veçanta. Në të ardhmen asistenca do të fokusohet më tepër në privatizimin e degës së shpërndarjes së KESH-it dhe në zbatimin e Modelit të Tregut të Energjisë.