Foto nga: Robert Manga, U.S. Embassy

USAID, Dhoma Kombëtare e Avokatisë boton revistën e parë juridike për avokatët në Shqipëri

TIRANË, 20 JANAR 2012     Me mbështetjen e Programit të USAID-it për Forcimin e Sistemit të Drejtësisë në Shqipëri (JuST), Dhoma Kombëtare e Avokatisë (DHKASH) iu prezantoi sot anëtarëve të saj numrin e parë të revistës së saj “Avokatia”, e vetmja revistë  juridike për avokatinë në Shqipëri. Botimi i saj është një ndër veprimtaritë e mbështetura nga USAID për forcimin e profesionalizmit dhe përgatitjes akademike të avokatëve shqiptarë.

Revista juridike “Avokatia” është një botim ligjor periodik i Dhomës Kombëtare të Avokatisë. Ajo shërben për nxitjen e debatit profesional mbi praktikën ligjore, si dhe mbi zhvillimet ligjore, gjyqësore e doktrinale kombëtare dhe ndërkombëtare. Ajo përfshin artikuj akademikë për shpjegimin e koncepteve kryesore të së drejtës dhe mbi çështje të ndryshme ligjore. Revista iu ofron juristëve një forum për debatin profesional mbi ligjet e reja të miratuara. Anëtarët e DHKASH-së do të mund të gjejnë aty dhe artikuj mbi vendimet e fundit të Gjykatës së Lartë, Gjykatës Kushtetuese, Gjykatës Europiane për të Drejtat e Njeriut dhe gjykatave të tjera ndërkombëtare.

Projekti pesëvjeçar JuST i USAID-it, i filluar në tetor 2010, synon rritjen e transparencës, paanshmërisë dhe efektshmërisë në gjykata, konsolidimin e rolit mbikëqyrës dhe antikorrupsion të organizatave të shoqërisë civile dhe medias, si dhe forcimin e arsimimit juridik dhe avokatisë në Shqipëri.

Në fjalën e tij, Drejtori i Misionit të USAID-it, zoti Joseph Williams, nënvizoi nevojën për të siguruar respektimin e shtetit ligjor si një tipar thelbësor i shoqërive demokratike dhe kërkesë e domosdoshme për Shqipërinë në ecjen përpara drejt integrimit evropian.

“USAID vlerëson rolin e rëndësishëm të avokatëve në përpjekjet e përditshme në mbrojtje të drejtësisë, paanësisë dhe shtetit të së drejtës”, tha zoti Williams. “Duke pasur parasysh apspiratën e Shqipërisë për të fituar statusin e kandidatit dhe anëtarësimin në Bashkimin Evropian, nevoja për reforma në sistemin e drejtësisë është më e madhe se kurrë. Po ashtu nuk ka qenë kurrë më e hapur dhe kaq e rëndësishme mundësia për ju — anëtarë të komunitetit të avokatëve dhe profesionistëve të ligjit — që të jepni kontributin tuaj në këtë proces. Ngritja e Programit të Arsimimit Vazhdues Ligjor, i cili po  zhvillohet tashmë pranë dhomave rajonale të avokatisë në Durrës dhe Vlorë, si dhe botimi i revistës “Avokatia” përfaqësojnë hapa konkrete që do të ndihmojnë në rritjen e kapaciteteve për avokatinë dhe edukimin ligjor në Shqipëri.”