Foto nga: Brittany Link, FORECAST   Duke dhënë mësim në një karrige me rrota në shtëpinë e saj në Tiranë, Teuta Halilaj (në qendër) frymëzon nxënësit me qëndrimin e saj pozitiv.

Mbështetje për Personat me Aftësi të Kufizuara

Kohëzgjatja:  Nëntor 2008 –  Gusht 2009

Partner: Fondacioni Shqiptar për të Drejtat e Personave me Aftësi të Kufizuara (FSHDPAK)

Fokusi gjeografik: Kombëtar

Përshkrimi:
Gratë me aftësi të kufizuara përbëjnë 10 për qind të të gjithë grave në mbarë botën1 dhe janë ndër grupet më të varfëra dhe më të lëna pas dore për shkak të diskriminimit si për gjininë, ashtu edhe për aftësinë e kufizuar. Sipas statistikave zyrtare2 mbi 94, 804 persona me aftësi të kufizuar jetojnë në Shqipëri, prej të cilëve tridhjetë e pesë për qind janë gra. Në muajin nëntor 2008, USAID-i i ofroi një grant Fondacionit Shqiptar për të Drejtat e Personave me Aftësi të Kufizuar (FSHDPAK) me synim nxitjen e integrimit të grave me aftësi të kufizuar në jetën sociale, ekonomike dhe politike të vendit, duke i fuqizuar ato dhe duke nxjerrë në pah aftësitë e tyre në avokati, lobim dhe lidership.

FSHDPAK u themelua në vitin 1996 për të përkrahur mundësi të barabarta, për të mbrojtur të drejtat e njeriut dhe për të përmirësuar cilësinë e jetës së personave me aftësi të kufizuara dhe të anëtarëve të familjeve të tyre në Shqipëri.  Projekti është vazhdimi i dy granteve të dhëna më parë prej USAID-it që fokusoheshin në rritjen e sigurimit të mjeteve lëvizëse përmes Punishtes së Karrigeve me Rrota “Mirësia” të FSHDPAK dhe përmes përmirësimit të zbatimit të Strategjisë Kombëtare për Personat me Aftësi të Kufizuara.

Arritjet kryesore:

• Granti ka ndihmuar dy lëvizje të grave me aftësi të kufizuara, përkatësisht “Gratë dhe vajzat intelektuale me aftësi të kufizuara” dhe “Klubi i grave” për të promovuar aksesin e grave me aftësi të kufizuar në arsim, punësim, jetën sociale, ekonomike dhe politike në mbarë vendin dhe në rajonin verior të Shkodrës.
• Në muajin maj, FSHDPAK-u organizoi Konferencën e parë Kombëtare për gratë dhe vajzat me aftësi të kufizuar që të rritet ndërgjegjësimi për nevojën e hartimit të një plani veprimi dhe të zhvillohet një strategji lobimi dhe avokatie për të adresuar çështjet specifike me të cilat përballen vajzat e reja dhe gratë me aftësi të kufizuara.
• Në bashkëpunim me Ministrinë e Punës, Çështjeve Sociale dhe Shanseve të Barabarta FSHDPAK publikoi një studim të veçantë “Gratë me aftësi të kufizuara në Shqipëri – të përfshira apo të neglizhuara?”, i cili vlerësonte përfshirjen e të drejtave të grave me aftësi të kufizuara në dokumentet e politikave në Shqipëri që përqendrohen në arritjen e barazisë gjinore dhe të drejtave të aftësisë së kufizuar. Gjithashtu, studimi bën një vlerësim të përfshirjes së grave dhe të vajzave me aftësi të kufizuar në strategjitë, programet dhe aktivitetet e organizatave të fokusuara në barazinë gjinore dhe të organizatave që kujdesen për çështjet e aftësisë së kufizuar.
• Një fushatë multi mediatike e detajuar nisi gjatë verës 2009 për të siguruar imazhe pozitive dhe për të rritur më tej njohuritë dhe ndërgjegjësimin lidhur me të drejtat e grave me aftësi të kufizuara.

1. Human Rights Watch, "Gratë dhe vajzat me aftësi të kufizuara” http://www.humanrightswatch.org/women/disabled.html

2. Ministria e Punës, Çështjeve Sociale dhe Shanseve të Barabarta, Qershor 2007.