Programi i Edukimit Ekonomik

Fjalimi i Drejtorit të Misionit të USAID-it, Z. Eduard T. Landau
Ceremonia e Nënshkrimit të Marrëveshjes së Mirëkuptimit mes USAID-it dhe Ministrisë së Arsimit dhe të Shkencës
Tiranë, 8 maj 2007

Ministër Pollo,

Të nderuar të ftuar dhe pjesëmarrës, dhe sigurisht mësues të përkushtuar dhe nxënës të zellshëm të shkollës “Besnik Sykja”!

Është një kënaqësi e madhe për mua që të jem këtu këtë mengjes në emër të Agjencisë së Shteteve të Bashkuara për Zhvillim Ndërkombëtar (USAID) për të nënshkruar një Marrëveshje Mirëkuptimi me Ministrinë e Arsimit dhe të Shkencës.

Kjo marrëveshje ravijëzon një sërë aktivitetesh të koordinuara që do të ndërmerren nga USAID-i dhe Ministria në dy vitet e ardhshëm për të mbështetur zbatimin e programeve cilësore ekonomike mësimore në shkollat e Shqipërisë.

Qeveria e Shteteve të Bashkuara është e angazhuar të nxisë kuptimin e koncepteve të ekonomisë së tregut dhe të sipërmarrjes së lirë në Shqipëri.

Disa prej programeve të USAID-it po punojnë që ta përkthejnë këtë njohuri në mundësi më të mëdha për punësim, shtim të ardhurash, një standard më të mirë jetese, dhe sigurisht, rritje ekonomike në shkallë të gjerë, qoftë për sipërmarrësin, për klientin e mikrokredisë apo për studentin.

Do të dëshiroja të përshëndesja përpjekjet që qeveria shqiptare ka ndërmarrë rishtazi për të përmirësuar sistemin arsimor në shkallë vendi, veçanërisht për rritjen e burimeve të caktuara për arsimin dhe për reformat e administrimit dhe të menaxhimit të institucioneve arsimore.

Meqenëse mund të bëhet më shumë për të arritur rezultate të mëdha,  kjo është arsyeja se përse USAID-i ka financuar një projekt dyvjeçar arsimimi ekonomik që do të zbatohet nga një OJF lokale, Junior Achievement Albania.

Ky program do ta ndihmojë Ministrinë për përmirësimin e cilësisë dhe të përshtatshmërisë së programit mësimor tradicional.

Z. Ministër, pres me kënaqësi bashkëpunimin tonë të ardhshëm dhe arritjen e rezultateve në këtë program.

Më lejoni t’ju uroj të gjithë ju të përfshirë në Programin Junior Achievement suksese në përpjekjet tuaja në të ardhmen.