Junior Achievement Albania

Fjala e Ambasadores së SH.B.A Marcie B. Ries (Marsi B. Ris)
Darkë Gala me Rastin e Prezantimit të Junior Achievement Albania (JAA)
Tiranë, 10 prill 2007

Mirëmbrëma –Ministri Pollo, Znj. Jenner, Z. Grunerud, të nderuar miq, ju faleminderit për ftesën që më bëtë për të qenë me ju këtë mbrëmje.

Për mua është gjithmonë kënaqësi të mbështes projektet e USAID-it dhe sidomos ato projekte që kanë të bëjnë me të rinjtë, të cilët janë brezi i ardhshëm.

Ky aktivitet shënon fillimin e një organizate, e cila nuk kam asnjë dyshim që do të japë një kontribut pozitiv për të ardhmen përmes ndërtimit të një ure të domosdoshme ndërmjet të rinjve shqiptarë dhe sektorit privat.

Junor Achievement (Programi për Sipërmarrjen e të Rinjve) në Shqipëri i bashkohet një rrjeti global të programeve të tilla.  I bashkohet më shumë se 100 zyrave në Shtetet e Bashkuara si dhe pothuajse 100 vendeve anëtare.

Përveç mbështetjes së rrjetit global, JAA gëzon dhe mbështetjen e komunitetit shqiptar të biznesit.
Unë dëshiroj të zhfrytëzoj këtë mundësi për të falënderuar për kontributin e dhënë Raiffeissen Bank, Kompaninë Ajrore Hungareze Malev, si dhe Institutin për Kërkime dhe Alternativa Zhvillimi (IDRA).  Ju faleminderit për mbështetjen dhënë JAA që në fillimet e saj.

Junior Achievement është themeluar në Shtetet e Bashkuara në vitin 1916 kur drejtues biznesesh kuptuan që një prezantim sa më i hershëm ndaj arsimimit ekonomik mund të përmirësonte novacionin, konkurueshmërinë dhe produktivitetin e forcës punëtore në Amerikë.

Në vitin 1918, Z. Theodore Vail, një ndër bashkëthemeluesit e JA dhe president i Kompanisë Amerikane të Telefon-Telegrafit (AT&T), shprehu vizionin e organizatës: "E ardhmja e vendit tonë varet nga ndërgjegjësimi i plotë i çdo individi për detyrimet dhe përgjegjësitë që i përkasin qytetarisë. Zakonet formohen në rini …ajo që kemi nevojë në këtë vend tani është që t’u mësojmë brezave që rriten që të kuptojnë që kursimi dhe ekonomizimi, shoqëruar me shumë punë, janë po aq të domosdoshëm sot sa ç’ishin për brezat e shkuar."

Shprehja e z. Vail shpreh shumë mirë frymën sipërmarrëse që i shërbeu Shteteve të Bashkuara kaq mirë pothuajse një shekull më parë dhe vazhdon t’i shërbejë dhe sot.

JAA do të përqendrohet tek të rinjtë e këtij vendi dhe mendje të reja të ndrituara në shkollat shqiptare nuk mungojnë.

Zhvillimi i ardhshëm dhe sidomos konkurueshmëria ekonomike e Shqipërisë varen nga investimet që bëhen sot në arsimimin dhe shëndetin e brezit të ri.

Unë përshëndes përpjekjet që qeveria shqiptare dhe Ministri Pollo kanë bërë kohët e fundit për të përmirësuar sistemin arsimor në vend, dhe veçanërisht për rritjen e burimeve financiare në shërbim të arsimit, reformës administrative, si dhe menaxhimit të institucioneve arsimore. 

Programet arsimore të Junior Achievement mund të japin një ndihmë të rëndësishme për të përmirësuar cilësinë dhe përshtatshmërinë e programeve tradicionale në shkollë.

Në veçanti, ky program paraqet në një mënyrë unike konceptin e sipërmarrjes.

Studentëve u ofrohet mundësia që të përdorin eksperiencën në praktikë duke krijuar dhe menaxhuar një ndërmarrje.

Drejtimi i një kompanie, qoftë kjo një pikë e vogël shitjeje pranë një shkolle apo prodhimi dhe shitja e produkteve në komunitetet vendore i jep studentëve një kuptim të thellë të koncepteve të tregut të lirë si dhe të praktikave më të mira të biznesit privat.

Energjia, vizioni dhe gatishmëria për të provuar gjëra të reja, cilësi të domosdoshme për një sipërmarrës në një treg konkurues, gjenden me bollëk tek të rinjtë. Por, ju si komunitet biznesi keni diçka që ju mungon atyre që janë vitet e eksperiencës.  Ju mund t’i jepni atyre njohuri mbi aftësitë praktike si dhe nxitje.  

Nën përkujdesjen tuaj, ata mund të zhvillojnë aftësitë dhe produktivitetin e tyre, që është diçka me përfitim si për studentin ashtu dhe për shoqërinë.

Prania e përfaqësuesve të bizneseve ndërkombëtare dhe kombëtare këtë mbrëmje është një tregues i vlerës që organizatat tuaja i kushtojnë zhvillimit arsimor dhe sipërmarrjes së të rinjve.

Suksesi dhe qëndrueshmëria afatgjatë e kësaj organizate do të varet nga mbështetja e komunitetit privat të biznesit. Dhe, ç’është më e rëndësishme, forca juaj e ardhshme punonjëse mund të vijë nga ky grup pjesëmarrësish në programin e Junior Achievement.

Në përfundim, unë dëshiroj të falenderoj dhe një herë Junior Achievement dhe sponsorët për organizimin e këtij aktiviteti të shkëlqyer dhe ju uroj suksese të gjithëve në këtë program.