Planifikimi Familjar

Fjalimi i Drejtorit të Misioni të USAID-it, Z. Eduard T. Landau
Konferenca për Mbylljen e Projektit  të Planifikimit Familjar në Shqipëri
19 qershor 2007

Zoti Ministër,
Zonja dhe Zotërinj,

Është kënaqësi e madhe për mua t’ju uroj mirëseardhjen në këtë konferencë që shënon përfundimin me sukses të Projektit Planifikimi Familjar në Shqipëri i USAID-it.

Ky projekt 3-vjeçar, me vlerë 1,5 milionë dollarë është vazhdim i investimit 12 vjeçar me vlerë mbi 15 milionë dollarë të Qeverisë së Shteteve të Bashkuara për të mbrojtur dhe për të përmirësuar shëndetin dhe mirëqenien e grave dhe të fëmijëve në Shqipëri.

USAID-i është i angazhuar të sigurojë që gratë dhe çiftet në gjithë botën të kenë akses në shërbimet vullnetare të planifikimit familjar dhe të jenë të informuar e të lirë në vendimet lidhur me jetën e tyre riprodhuese.

Aksesi në informacion dhe në shërbime cilësore mund të sjellë përfitime të mëdha në drejtim të shëndetit dhe të jetës ekonomike dhe sociale të familjeve dhe të komunitetit.

Ai (aksesi në informacione dhe në shërbime) mbron shëndetin e grave dhe të fëmijëve duke zvogëluar numrin e shtatëzanive me risk të lartë. Ai kontribuon në luftën kundër HIV/AIDS dhe sëmundjeve të tjera nëpërmjet informimit, këshillimit dhe ofrimit të kontraceptivëve modernë. Ai mbështet të drejtat e grave dhe mundësitë për arsimim, për punësim dhe për pjesëmarrje të plotë në jetën shoqërore.

Jam krenar të them se në 10 vitet e fundit, nëpërmjet USAID-it, gjendja e shërbimeve të planifikimit familjar në Shqipëri është përmirësuar dhe shtrirë nga vetëm disa klinika në Tiranë, në çdo qendër shëndetësore në çdo komunë dhe rreth të Shqipërisë. Kjo është një arritje e madhe dhe unë dua të falenderoj partnerin tonë Xhon Snou Ink (JSI) për ekspertizën që kanë ofruar dhe për angazhimin e plotë për zhvillimin e Shqipërisë.

Investimi i Qeverisë së Shteteve të Bashkuara në shëndetësi nuk mbaron këtu.

Nëpërmjet programeve të USAID-it, ne po punojmë së bashku për përmirësimin e cilësisë së shërbimeve dhe të aksesit në shëndetin parësor për të gjithë shqiptarët, si dhe mbështesim programe që nxisin zhvillimin ekonomik, që forcojnë shtetin ligjor dhe që mbështesin tranzicionin demokratik të Shqipërisë.

USAID-i  punon në partneritet me Ministrinë e Shëndetësisë dhe do të doja t’ju përgëzoja për investimet  tuaja së fundmi në mbështetje të shëndetit riprodhues dhe të planifikimit familjar. Rritja e qëndrueshme e investimeve në sigurimin e kontraceptivëve luan një rol të rëndësishëm në përmirësimin e shëndetit  riprodhues të nënës, të shëndetit të fëmijëve dhe të familjes.

Më lejoni edhe një herë të ofroj urimet dhe falenderimet e mia personelit të Projektit, JSI-së dhe Ministrisë së Shëndetësise për zbatimin e suksesshëm të këtij projekti.

Përpjekjet tuaja kanë lënë një gjurmë të pashlyeshme në shëndetin dhe të drejtat e grave, të fëmijëve dhe të familjeve shqiptare.