Konkurrueshmërisë Bujqësore

Fjalim i Drejtorit të Misionit të USAID-it në Shqipëri, Z. Edward T. Landau
Ceremonia e Hapjes së Panairit të Përvitshëm të Agrobiznesit në Shqipëri
Tiranë, 21 shtator 2007

I nderuar President i Shqipërisë,
I dashur Ministër,
President i KASH-it,

Është kënaqësi për mua të marr pjesë këtë mbrëmje në hapjen e panairit të përvitshëm të agrobiznesit organizuar nga KASH.

Që prej vitit 2001, USAID-i ka mbështetur krijimin e një shoqate bujqësore që përfaqëson shoqatat e agrobiznesit për të asistuar me shërbime sektorin bujqësor shqiptar në rritje dhe për të mbrojtur fermerët dhe agrobizneset shqiptare. USAID-i është i kënaqur me asistencën që i ka dhënë Këshillit të Agrobiznesit Shqiptar (KASH) dhe ju përgëzon për organizimin një veprimtarie tjetër të suksesshme.

Pas 25 vite përvoje pune në vende të ndryshme të botës me USAID-in, unë besoj fort në faktin që zhvillimi bujqësor i një vendi mund të ketë një ndikim të jashtëzakonshëm në uljen e varfërisë, në krijimin e vendeve të punës, në rritjen e të ardhurave, si dhe në nxitjen e rritjes ekonomike dhe të zhvillimit në përgjithësi. 

Popullsia e Shqipërisë në pjesën më të madhe të saj është ende rurale dhe ka një varësi të jashtëzakonshme nga bujqësia dhe nga industria e lidhur me bujqësinë. Sektori prodhon pothuajse 23 për qind të produktit të brendshëm bruto të Shqipërisë.

Rëndësia e këtij sektori dhe potenciali domethënës i fermerëve shqiptarë për të rritur prodhueshmërinë, për t’i shërbyer tregut të brendshëm dhe për të kapur tregjet e eksportit, janë arsyet për të cilat Qeveria e Shteteve të Bashkuara, përmes USAID-it, ka kënaqësinë të vërë në dispozicion gjatë pesë viteve të adhshme shumën prej 10 milionë dollarësh për të përmirësuar konkurrueshmërinë e fermerëve shqiptarë.

Programi i Konkurrueshmërisë Bujqësore Shqiptare (AAC) i USAID-it do të ndihmojë fermerët shqiptarë në përmirësimin e prodhimtarisë së veprimtarisë së tyre, si dhe në reagimin e tyre ndaj ndryshimit të kushteve dhe të mundësive të tregut.

Projekti do t’u mundësojë fermerëve shqiptarë të jenë konkurrues në tregjet e brendshme dhe të jashtme duke u përqendruar në prodhime bujqësore vlerë-lartë dhe në përpunimin vlerë-shtues.

Parimi ynë themelor është forcimi i zinxhirit të tregut përmes lidhjes së fermerëve prodhues me tregun, atë të brendshëm edhe atë të jashtëm. Hallkat kryesore në zinxhir janë shoqatat e agrobiznesit dhe ato të fermerëve e të bizneseve.

Ky program i ri, kombinuar me programet e USAID-it që mbështesin demokracinë në Shqipëri që bazohet në shtetin ligjor, investime më të mëdha në shëndetësi, projekte të ndryshme ekonomike si dhe zbatimi i suksesshëm i Marrëveshjes Prag të Sfidës së Mijëvjeçarit për Shqipërinë, ndihmon në vendosjen e një themeli për rritjen e qëndrueshme ekonomike dhe për integrimin në NATO e në komunitetin Euro-Atlantik.

U uroj të gjithë pjesëmarrësve në panairin e kësaj fundjave, sukese dhe pres me kënqësi të ndihmojmë bujqësinë shqiptare të arrijë potencialin e saj të vërtetë.