Foto nga: USAID Shqipëri   Një panel investitorësh amerikanë dhe evropianë ndanë përvojat dhe praktikat e tyre më të mira me homologët shqiptarë për përpjekjet e privatizimit në vende të tjera gjatë një seminari të organizuar nga USAID-i. Gjatë dy viteve të ardhshëm, USAID-i do të asistojë në privatizimin e sistemit të shpërndarjes së kompanisë shtetërore elektroenergjetike shqiptare, KESH.

Programi për Privatizimin e Shpërndarjes së KESH-it

Kohëzgjatja: Gusht 2007- Gusht 2009

Partner: Advanced Engineering Associates International, Inc. (AEAI)

Fokusi Gjeografik: Kombëtar

Përshkrimi i Programit:
Sektori elektroenergjetik shqiptar ka vuajtur nga mungesa e investimeve, mirëmbajtja e dobët dhe aftësitë e kufizuara për import. Këto probleme rëndohen prej menaxhimit ineficient të Korporatës shtetërore Elektroenergjetike Shqiptare (KESH), e cila ndodhet në një situatë të mjerueshme financiare, pa mundur të zvogëlojë humbjet dhe të përmirësojë arkëtimet. Mungesat e një furnizimi të besueshëm dhe të mjaftueshëm të energjisë elektrike kanë ndikuar keqas në rritjen ekonomike të Shqipërisë. Për të adresuar këtë krizë të gjatë energjetike, Qeveria e Shqipërisë, me mbështetje të fuqishme të donatorëve ka vendosur të shpjerë përpara privatizimin e aseteve të shpërndarjes së KESH-it. Programi i USAID-it i Mbështetjes së Privatizimit të Shpërndarjes së KESH-it do të asistojë Qeverinë e Shqipërisë, dhe veçanërisht Ministrinë e Ekonomisë, Tregtisë dhe Energjetikës, në këtë përpjekje për të zhvilluar politikat e nevojshme rregulluese ligjore dhe kuadrin e tregut për privatizimin dhe ndërtimin e kapacitetit të Entit Rregullator të Energjisë (ERE) në mënyrë që të shërbejë si një organ rregullator transparent dhe i pavarur nga kontrolli i shtetit.