Shqipëria fiton Fazën II të Programit të Pragut të KSM-së

Shqipëria fiton Fazën II të Programit të Pragut të KSM-së

TIRANË, 27 GUSHT 2008     Më 15 gusht 2008, Bordi i Drejtorëve të Korporatës Sfida e Mijëvjeçarit (KSM) miratoi Propozimin e Qeverisë së Shqipërisë për Fazën e II-të të Programit të Pragut për zvogëlimin e korrupsionit dhe për forcimin e shtetit ligjor në Shqipëri.

Sot, në një takim me Kryeministrin Sali Berisha, Drejtori i USAID-it, z. Eduard Landau, zyrtarisht njoftoi mbi vendimin e KSM-së për të mbështetur me një program prej 16.4 milionë dollarësh Shqipërinë. Ceremonia zyrtare e nënshkrimit midis të dy qeverive do të zhvillohet në muajin shtator.

USAID-i do të menaxhojë këtë program në partneritet me institucione të ndryshme qeveritare dhe jo-qeveritare shqiptare.

“Ne jemi të kënaqur të mbështesim këtë program të rëndësishëm për të ndihmuar Shqipërinë në luftën kundër korrupsionit dhe në trajtimin e reformave kryesore gjyqësore dhe në hapjen e rrugëve të reja për zhvillimin ekonomik”, – tha Landau. Sipas Landaut, një Program i Fazës II-të do ta ndihmojë Shqipërinë të bëhet më konkuruese për programet e ndihmës dypalëshë të KSM-së, një Kompakt KSM-je.

Shqipëria aktualisht po zbaton një Program Pragu të KSM-së që përqëndrohet në përgjigjen ndaj korrupsionit në tatime, në regjistrimin e biznesit dhe në prokurime. Programi planifikohet të përfundojë në muajin nëntor 2008.

Më shumë informacion mbi Fazën II-të të Programit të Pragut do të bëhet me dije në javët e ardhshme dhe do të jetë i disponueshëm në faqen e internetit të USAID Shqipërisë: http://albania.usaid.gov 

# # #