Foto nga: USAID Shqipëri   Drejtoresha e Misionit të USAID-it në Shqipëri, Roberta Mahoni, nënshkruan Marrëveshjen e Pragut të KSM, Faza II me Ministrin e Financave, Ridvan Bode. Kjo marrëveshje dypalëshe dyvjeçare me vleftë prej 15.7 milionë dollarësh do të fokusohet në luftën kundër korrupsionit përmes reformave qeveritare.

Faza 2 në Luftën e Shqipërisë Kundër Korrupsionit

FAZA 2 NË LUFTËN E SHQIPËRISË KUNDËR KORRUPSIONIT
USAID-i, Qeveria e Shqipërisë Nënshkruajnë Programin e Pragut për Shqipërinë me Korporatën Sfida e Mijëvjeçarit, Faza II

Tiranë, 17 tetor 2008 – Sot Shqipëria hyri në një raund të ri në luftën kundër korrupsionit me nënshkrimin e Marrëveshjes së dytë të Programit të Pragut me Korporatën Sfida e Mijëvjeçarit (KSM) ndërmjet Shqipërisë dhe Shteteve të Bashkura të Amerikës.

Kjo marrëveshje dypalëshe që do të zbatojë për një periudhë 2-vjeçare Programin e Pragut “Faza e Dytë” me vleftë 15.7 milionë dollarë, ngrihet mbi suksesin e Programit aktual të Pragut të KSM-së, i cili do të përfundojë më 15 nëntor 2008. Programi që do të përfundojë në muajin nëntor fokusohet në uljen e korrupsionit në prokurimet publike, në administrimin e tatimeve, si dhe në regjistrimin e biznesit.

Programi i ri, i administruar nga Agjencia e Shteteve të Bashkuara për Zhvillim Ndërkombëtar (USAID), synon të përmirësojë aftësinë e sistemit gjyqësor për trajtimin e mosmarrëveshjeve administrative, të zvogëlojë korrupsionin dhe ineficiencën në administratën tatimore, të ndërtojë një qendër kombëtare “one-stop shop” për licensat e bizneseve, të krijojë një sistem transparent të dhënies së lejeve të ndërtimit, si dhe të formojë Njësi të Përbashkëta Hetimore në gjashtë qytete për të hetuar çështjet e korrupsionit.

Gjatë fjalimit të tij, Kryeministri i Shqipërisë, Sali Berisha, përgëzoi Programin e Pragut të Korporatës Sfida e Mijëvjeçarit (KSM) dhe përmendi arritjet e Qeverisë gjatë fazës së tij të parë, - "të cilat",- tha ai, - "kanë përmirësuar në mënyrë të domethënëse pozitën e Shqipërisë në renditjen botërore për të bërë biznes dhe në perceptimet për korrupsionin".

Ambasadori i Sh.B.A.-së, Xhon L. Uidhërs II, tha gjithashtu se partneriteti midis Shteteve të Bashkuara dhe Shqipërisë nën Programin e Korporatës Sfida e Mijëvjeçarit (KSM)  ka arritur reforma të dukshme. Ai theksoi se nevojitet më shumë punë për të çrrënjosur korrupsionin, efektet brejtëse të së cilit, “vazhdojnë të depërtojnë në sistemet e edukimit dhe të shëndetësisë në Shqipëri, të ligështojnë besimin e publikut tek gjykatat shqiptare dhe të rrezikojnë të drejtat e pronës  të gjithë shqiptarëve.” Uidhërs shtoi që në fazën e dytë të programit  “Amerika do t’a ndihmojë Shqipërinë të arrijë suksese në luftën kundër korrupsionit... sepse kjo ështe ajo që kërkojnë shqiptarët”.

Z. Berisha, Ambasadori Uidhërs dhe Znj. Kraham, Nënzëvendës Presidente e Departamentit të Politikave dhe të Marrëdhënieve Ndërkombëtare të KSM-së, ndoqën nënshkrimin e marrëveshjes midis Drejtoreshës së USAID-it, Zj. Roberta Mahoni dhe Ministrit të Financave, Z. Ridvan Bode dhe më pas vizituan ekspozitën e veçantë me paraqitjet e arritjeve të Korporatës Sfida e Mijëvjeçarit në fazën e parë. 

###