Aktiviteti i Promovimit të Tirana CitySpots në Tiranë

Aktiviteti i Promovimit të Tirana Cityspots në Tiranë

TIRANË, 11 SHTATOR  2008    Sot, USAID-i  sponsorizoi promovimin zyrtar të guidës së Thomas Cook (Tomas Kuk) “Tirana CitySpots“. Ambasadori i Sh.B.A.-së, Xhon L. Uidhërs II dhe Zëvendës Kryetari i Bashkisë së Tiranës, z. Eduard Shalsi morën pjesë në këtë ceremoni dhe mbajtën fjalën e rastit mbi turizmin në Shqipëri. Në këtë veprimtari ishte gjithashtu i pranishëm dhe z. Tim Klansi, i cili shpërndau kopje promocionale të librit me nënshkrimin e tij.

Në fjalën e tij, Ambasadori Uidhërs pohoi sfidat domethënëse për zhvillimin e këtij sektori, veçanërisht përsa i përket infrastrukturës, menaxhimit të burimeve të qëndrueshme, si dhe investimeve të sektorit privat, por gjithashtu theksoi potencialin e rëndësishëm turistik të Shqipërisë.  “Në vitin 2008 Shqipëria pati një numër rekord turistësh dhe ka shumë arsye për të besuar që përmes menaxhimit të duhur, ky nivel do të vazhdojë të rritet, ndërsa përherë e më shumë përsona zbulojnë Shqipërinë”, - tha Uidhërs.

Kërkimi i informacionit për librin u zhvillua në muajin nëntor 2007 me ndihmën e USAID-it. Mbi 50 biznese private janë përfshirë në Tirana CitySpots, si dhe mbi 20 vende tërheqëse brenda Tiranës, Beratit, Krujës dhe Shkodrës. Ky libër është pjesë e serisë “CitySpots”, e cila paraqet qytetet e mëdha kryesore nga mbarë bota. Libri është duke u shpërndarë drejtëpërsëdrejti prej Thomas Cook Publishing (Botuesi Tomas Kuk), si dhe përmes faqes së tyre të internetit: http://www.thomascookpublishing.com/contactus.htm.

Në vazhdim të Tirana CitySpots, Thomas Cook Publishing në Mbretërinë e Bashkuar ka bërë me dije se do të prodhojë një guidë udhëtimi tjetër, më të madhe, për të mbuluar tërë vendin. Travellers Albania do të botohet në mars të vitit 2009.

# # #