Foto nga: USAID Shqipëri   Drejtoresha e Misionit të USAID-it, Roberta Mahoney, e ulur pranë Ministres së Shëndetësisë, Anila Godo, kumtoi fjalën lidhur me rëndësinë e Vëzhgimit Demografik Shëndetësor për reforma në të ardhmen në sektorin shëndetësor të vendit.

Vëzhgimi i parë kombëtar Demografik Shëndetësor

Vëzhgimi i parë Demografik Shëndetësor në Shqipëri
Informacioni do të përmirësojë politikat shëndetësore dhe ofrimin e kujdesit shëndetësor

Tiranë, 31 tetor 2008    Sot, Ministrja e Shëndetësisë, zj. Anila Godo, përkrah përfaqësuesve të disa agjencive donatore ndërkombëtare, përfshirë USAID-in, UNICEF-in, UNFPA-në, OBSH-në dhe Agjencinë Zvicerane për Zhvillim dhe Bashkëpunim, nisën fazën e dytë të aktivititetit të Vëzhgimit të parë Demografik Shëndetësor të Shqipërisë.

Duke nisur nga nëntori, qindra intervistues nga INSTAT-i do të vizitojnë familje në mbarë Shqipërinë për të mbledhur informacion mbi shëndetin, arsimimin, stilin e jetesës së njerëzve sipas një pyetësori të standardizuar. Rezultatet e vëzhgimit do të ofrojnë informacion të përditësuar mbi karakteristikat e familjeve shqiptare, të cilat do të krahasohen me statistika sociale ndërkombëtare.

Në këtë veprimtari, Ministrja shqiptare e Shëndetësisë, zj. Anila Godo, theksoi rëndësinë e të paturit të të dhënave të besueshme dhe konsekuente për të ndërmarrë vendime mbi politikat, veçanërisht lidhur me çështjet shëndetësore të grave dhe të fëmijëve. Ministria e Shëndetësisë po drejton procesin e vëzhgimit me anë të Institutit të Shëndetit Publik dhe INSTAT-in.

Ministrja Godo theksoi gjithashtu rëndësinë e ofrimit të informacionit sa më të plotë prej familjeve që do të pyeten prej ekipeve intervistuese, si dhe e siguroi publikun mbi ruajtjen e plotë të fshehtësisë së të gjitha përgjigjeve.

Vëzhgimi do të mbledhë vlerësime statistikore, lehtësisht të krahasueshme në arenën ndërkombëtare për indikatorë socialë në Shqipëri, duke përfshirë vlerësime mbi popullsinë, migracionin, arsimimin, lindshmërinë, planifikimin familjar, vdekshmërinë foshnjore dhe të fëmijëve, shëndetin e fëmijës, sjelljet seksuale, HIV/AIDS dhe Sëmundjet Seksualisht të Transmetueshme (SST), praktikat e ushqyerjes me gji, çështjet gjinore dhe dhunën gjinore.

Në fjalimin e saj gjatë ceremonisë, Drejtoresha e Misionit të USAID-it, zj. Roberta Mahoni, shpjegoi se përse USAID-i dhe donatorë të tjerë mbështesin zhvillimin e këtij vëzhgimi. “Vëzhgimi Demografik Shëndetësor do t’i shpjerë reformat aktuale dhe të të ardhmes jo vetëm një hap përpara, por disa hapa përpara drejt identifikimit të nevojave të popullsisë, në mënyrë që të hartohen politika dhe programe dhe që burime të mjaftueshme për t’i financuar ato të mund të jepen”.

Zj. Mahoni përmendi gjithashtu që më shumë investime në sektorët e shëndetësisë dhe të arsimit janë pjesë e pandarë për përparimin e vazhdueshëm të reformave në qeverisje, në shtetin ligjor dhe në zhvillimet ekonomike.

Faza e mbledhjes së të dhënave do të pasohet prej fazës së përpunimit dhe të shkrimit të raportit me rezultatet përfundimtare, të cilat do të shpërndahen në muajin shtator 2009. Intervistuesit do të përdorin mjete elektronike për mbledhjen e të dhënave, një përqasje novatore e përdorur vetëm në disa prej sondazheve të mëparshme kombëtare të zhvilluara në vende të tjera.

Vëzhgimi Demografik Shëndetësor Shqiptar u mundësua përmes mbështetjes së disa agjencive ndërkombëtare donatore, përfshirë USAID-in, UNICEF-in, SCO-n, UNFPA-në dhe OBSH-në. Asistenca teknike që siguron cilësinë e vëzhgimit ofrohet prej MACRO International.

###