Në konferenc, Drejtori i ACIT-it, Selim Belortaja (majtas), përshkroi se si renditja e ulët e Shqipërisë në Indeksin Global të Konkurrueshmërisë reflekton prodhueshmërinë ende të dobët në vend.

USAID, ACIT diskutojnë vendin e Shqipërisë në raportin e konkurrueshërisë globale

USAID, ACIT Diskutojnë renditjen e Shqipërisë në Raportin e Konkurrueshmërisë Globale

26 nëntor 2008, TIRANË – "Raporti i Konkurrueshmërisë Globale i këtij viti tregon që konkurrueshmëria mbetet një sfidë për zhvillimin ekonomik të Shqipërisë”, - ishte përfundimi i Selim Belortasë, Drejtor Ekzekutiv i Qendrës Shqiptare për Zhvillim Ndërkombëtar (ACIT), në një konferencë të sponsorizuar nga kjo organizatë për këtë raport.

Për të katërtin vit radhazi, ACIT, si partner vendor i Forumit Ekonomik Botëror, organizoi një panel specialistësh të ekonomisë për të diskutuar gjetjet e raportit dhe performancën tregtare të Shqipërisë. Përfaqësuesit përfshinin zyrtarë nga ministritë dhe nga agjencitë qeveritare, nga biznesi privat, nga media lokale, si dhe nga donatorët.

Me luhatjet e sotme të ekonomise globale, nxitja e një mjedisi ekonomik pro konkurrueshmërisë, që të ndihmojë ekonominë dhe biznesin vendas t’i bëjnë ballë goditjeve nga kriza globale dhe të përmirësojnë performancën ekonomike, është më e rëndësishme se kurrë. Sipas Belortasë, renditja e Shqipërisë në Raportin e Konkurrueshmërisë Globale (vendi i 108-të në 134 vende), lidhet me produktivitetin ende të dobët të vendit, si dhe nxjerr në pah nevojën për të rritur konkurrueshmërinë e ndërmarrjeve të vogla dhe të mesme. 

“Synimi ynë gjithë këto vite ka qenë që t’i paraqesim këto gjetje në formën e një mjeti orientues për drejtuesit e bizneseve dhe politikëbërësit, me qëllim që ata të identifikojnë pengesat për përmirësimin  e konkurrueshmërisë dhe për nxitjen e debatit mbi rrugët dhe strategjitë për kapërcimin e tyre”, - shpjegon Selim Belortaja.

ACIT-i, një program i përbashkët i Agjencisë së Shteteve të Bashkuara për Zhvillim Ndërkombëtar (USAID) dhe Institutit për Studime Bashkëkohore (ISB), ka filluar aktivitetin  në vitin 2003 për të përmirësuar aftësinë e sektorëve publikë e private për trajtimin e çështjeve që lidhen me tregtinë, kryesisht nëpërmjet pajisjes së tyre me dijet dhe informacionin e nevojshëm, që mundësojnë marrjen e vendimeve të duhura.

Aktivitetet më të fundit janë fokusuar në përmirësimin e politikave  tregtare dhe rritjen e aksesit të publikut tek shanset që krijon procesi i liberalizimit tregtar dhe integrimit.

###

Prezantimi nga Drejtor ACIT, Z. Selim Belortaja, 26 nëntor 2008, "Konkurrueshmëria e Ekonomisë Shqiptare, Prirje dhe Probleme." [PDF, 483.84 KB]

Kjo faqe përmban dokumente në format pdf. Për t'i lexuar ato shkarkoni Adobe Reader!