USAID-i prezanton mjetin e ri për përmirësimin e Administratës Tatimore Vendore

USAID-i prezanton mjetin e ri për përmirësimin e Administratës Tatimore Vendore

Tiranë, 28 janar 2009    Në konferencën për shtyp në të cilën mori pjesë Ministri i Financave, z. Ridvan Bode dhe Drejtoresha e Misionit të USAID-it, zj. Roberta Mahoni, USAID-i i prezantoi Qeverisë një manual të ri mbi tatimet në mbështetje të reformave në administratën tatimore. “Udhëzuesi  për Administrimin e Taksave dhe Tarifave Vendore” do të shërbejë si një mjet për rritjen dhe trainimin profesional të administratorëve tatimorë vendorë  dhe do të mbështesë drejpërsëdrejti suksesin e reformës financiare të qeverisjes vendore.

Në fjalën e saj, zj. Mahoni pranoi rëndësinë e këtij sektori, duke vënë në dukje që procedura të qarta, operacione transparente dhe një staf profesional e me integritet janë thelbësorë për administrimin e tatimeve dhe të tarifave vendore.

“Ky botim është udhëzuesi për përmirësimin e performancës në mbledhjen dhe në administrimin e tatimeve dhe tarifave vendore, “ – tha Mahoni. “Qeveritë vendore që përdorin këto mjete do të jenë në gjendje të ofrojnë shërbime më të mira publike ndaj qytarëve dhe do të nxisin aftësinë e tyre për të vepruar në mënyrë të pavarur dhe eficiente si njësi moderne vetëqeverisjeje vendore”, - shtoi Mahoni.

Udhëzuesi u mbështet nga Ministria e Financave dhe nga Ministria e Brendshme, si dhe do t’i ofrohet të gjithë njësive të qeverisjes vendore në Shqipëri.

Publikimi është një udhëzues praktik që do të ndihmojë administratorët e taksave vendore në punën e tyre të përditshme dhe përbëhet nga dy pjesë. Pjesa e parë përqendrohet në politikat tatimore dhe ofron një përshkrim të legjislacionit duke përkufizuar çdo tatim dhe tarifë vendore. Pjesa e dytë fokusohet në administrimin tatimor dhe procedurat për administrimin e taksave dhe të tarifave vendore, duke përfshirë regjistrimin, vlerësimin, kontrollin dhe procedurat e mbledhjes me forcë të tyre. Gjithashtu, në këtë udhëzues janë përfshirë procesi i raportimit transparent dhe nevoja për një bashkëpunim efektiv mes administratës tatimore vendore dhe institucioneve të ndryshme të qeverisjes vendore.

Botimi u përgatit përmes Programit të USAID-it për Qeverisjen Vendore në Shqipëri (LGPA), i cili punon me bashkitë për nxitjen e zhvillimit të ekonomisë vendore, për përmirësimin e qeverisjes vendore  dhe për fuqizimin e pjesëmarrjes së shoqërisë civile dhe të sektorit privat në zhillimin vendor. Bashkitë partnere të LGPA-së janë: Fieri, Fushë-Kruja, Gramshi, Himara, Korça, Kukësi, Lezha, Librazhdi, Pogradeci dhe Shkodra.

Për më shumë informacion lutemi të kontaktoni: Silvana Meko, Specialiste për Qeverisjen Vendore në LGPA, Celular: 0694033831, email: smeko@lgpa.al, telefon: ++355-4-2266-637, ose www.lgpa.al 

###