Përmirësimi i jetesës përmes turizmit të qëndrueshëm

Fjalimi i Drejtoreshës së USAID-it
“Përmirësimi i jetesës në Shqipëri përmes turizmit të qëndrueshëm”
20 janar 2009

Të nderuar Ministra, të nderuar zonja dhe zotërinj,

Jam shumë e lumtur që ndodhem sot këtu, në vizitën timë të parë në Durrës, për të hapur këtë konferencë të promovimit të rritjes dhe të zhvillimit të qëndrueshëm të sektorit të turizmit në Shqipëri.

Do të doja të falenderoja Ministrin Gjana dhe Ministrin Pango për fjalimet e tyre në këtë forum sot dhe për mbështetjen e kësaj nisme.

Një objektiv kryesor i asistencës së zhvillimit të Sh.B.A.-së në Shqipëri është të promovojë zhvillim ekonomik të qëndrueshëm dhe me bazë të gjerë, si dhe ulje të varfërisë. Ne e konsiderojmë zhvillimin e turizmit si kyç në arritjen e këtij objektivi.

Turizmi është dalluar si një prej forcave drejtuese të ekonomisë shqiptare – duke ofruar punë dhe të ardhura për mijëra familje.

Udhëtimi dhe turizmi ndikojnë të gjithë sektorët e ekonomisë shqiptare, nxit rritjen e ndërmarrjeve të vogla dhe të mesme në sektorë të tjerë – krijon vende pune dhe të ardhura përgjatë rrugës.

Në bazë të raportit të vitit 2008 të Këshillit Botëror për Udhëtimet dhe Turizmin, ekonomia e udhëtimit dhe e turizmit në Shqipëri në mënyrë direkte dhe indirekte arriti në 1.8 miliardë dollarë, ekuivalente e thuajse 15 për qind të Produktit të Brendshëm Bruto të Shqipërisë, si dhe numri total i të punësuarve në afro 150,000 vende pune ose 12 për qind e numrit total të të punësuarve.

Duke dalluar këtë, jam e kënaqur që Qeveria e Shqipërisë dhe veçanërisht Ministria e Turizmit, Kulturës, Rinisë dhe Sporteve e kanë bërë zhvillimin e turizmit një përparësi kombëtare.

Si e tillë, ky sektor ka bërë përparime të mëdha gjatë viteve të fundit.

Qeveria dhe sektori privat kanë ndihmuar në tërheqjen e turistëve të huaj me përfundimin e aeroportit të ri ndërkombëtar të Rinasit, me përfaqësime në panairet ndërkombëtare të udhëtimit, me investime në fushatat reklamuese në massmedia për CNN, si dhe me zhvillimin e një faqeje interneti sipas teknologjisë më të fundit për Agjencinë Kombëtare të Turizmit – të gjitha mjete të rëndësishme që kontribuojnë në vendosjen e Shqipërisë në hartë si një destination turistik ndërkombëtar.

Në strategji, parimi i zhvillimit të turizmit të qëndrueshëm theksohet si parimi drejtues për të ndërtuar sektorin. Duke vepruar kështu, Shqipëria ka zgjedhur nëj shteg të vështirë, por atë të duhurin, që në periudhën afatgjatë do të ruajë trashëgiminë kulturore, do të ruajë burimet natyrore, do të mbrojë monumente arkeologjike dhe historike të çmuar, si dhe do të përmirësojë jetesën në Shqipëri.

Në praktikë, parimi është i vështirë për t’u zbatuar për shkak se zhvillimi i qëndrueshëm kërkon planifikim domethënës, lidership vizionar, koordinim të madh dhe veprime të bashkërenduara në çdo nivel për të prodhuar rezultate që ndihen dhe kuptohen nga shqiptarët.

Njëra prej detyrave të mia të mëparshme i përkiste një vendi të njohur për turizmin e tij – Egjiptin. Ndërsa Egjipti kishte një tërheqje unike prej piradimave dhe vendeve të ruajtura mirë të qytetërimit të lashtë, vendi kishte mësuar se si të maksimizonte përvojën e turistit duke i bërë vizitorët të rikthehen dhe të zgjerojnë ndikimin e turizmit në ekonominë e Egjiptit.

Ata e bënë këtë duke u përqendruar në gjërat, që nuk janë të panjohura për realitetin shqiptar, përmes rritjes së infrastrukturës së vendit, ushqimit dhe vendeve të akomodimit në bazë të standardeve ndërkombëtare.
Kohët e fundit, USAID-i në Egjipt zhvilloi një partneritet publik-privat me Korporatën Heinz për të ndihmuar fermerët egjiptianë të prodhojnë domate, që do të mbështesin tregun turistik vendas, duke furnizuar hotelet dhe restorante, të cilat u shërbëjnë vizitorëve të huaj.

Sot, vendet që ofrojnë turizëm kulturor, eko-turizëm, turizëm aventure dhe agro-turizëm, tërheqin me mijëra vizitorë – vizitorë të cilëve u pëlqen qetësia e jetës së fshtatit, që vlerësojnë origjinalitetin e artizanatit lokal dhe që shijojnë prodhimet e tokave bujqësore.

Ju inkurajoj të mendoni në mënyrë krijuese gjatë dy ditëve të ardhshme në mënyrë që të mund të bëhemi partnerë për të fuqizuar burimet dhe për të zgjeruar ndikimin e punës sonë. Për ta bërë turizmin e qëndrueshëm një realitet në Shqipëri, nevojiten përpjekje të koordinuara mes sektorit publik dhe privat, si dhe një plan veprimi praktik dhe i fuqishëm.

Ndërsa mbështesim sot strategjinë e Qeverisë së Shqipërisë dhe përpjekjet e sektorit privat për të ndërtuar sektorin e turizmit në Shqipëri, e bëjmë këtë duke kërkuar mënyra për të përmirësuar jetesën e shqiptarëve dhe të komuniteteve të tyre.

Do të doja të falenderoja pjesëmarrësit, veçanërisht Ministrat për pjesëmarrjen e tyre sot në mbështetje të këtij aktiviteti dhe mbetem në pritje të dëgjoj mbi rezultatet e këtij seminari.

###