USAID, ILDKP mbështesin rolin e medias dhe të shoqërisë civile në luftën kundër korrupsionit

SHKODËR, 10 MARS 2009     Sot Programi i USAID-it për Shtetin Ligjor, në bashkëpunim me Inspektoratin e Lartë të Deklarimit të Pasurive (ILDKP) organizuan në Shkodër një semianr mbi Konfliktin e Interesave (KI) dhe Deklarimin e Pasurive. Ky është seminari i tretë i mbështetur nga USAID-i dhe ILDKP-ja që synon të rrisë njohuritë mbi ligjet që rregullojnë konfliktin e interesave dhe deklarimin e pasurive si dhe bashkëpunimin me shoqërinë civile e median në zbulimin dhe denoncimin e rasteve të korrupsionit. 

Në seminar morën pjesë përfaqësues nga organizatat vendore të shoqërisë civile, gazetarë dhe zyrtarë të qeverisjes vendore të katër bashkive, komunave nga qarqet e Lezhës dhe Shkodrës. Gjithashtu morën pjesë edhe përfaqësues të Komisionit të verifikimit dhe të pengimit të Konfliktit të Interesave nga Mali i Zi.

Në fjalën e hapjes, z. Sean Huff, Shef i Programeve të Zhvillimit të USAID-it përmendi kontributin e ILDKP-së në krijimin e një sektori publik më transparent dhe të përgjegjshëm në Shqipëri. Gjithashtu, ai inkurajoi median, grupet e shoqërisë civile dhe qytetarët e zakonshëm, që në bashkëpunim me organizata të tilla si ILDKP të gjejnë mënyra për të punuar së bashku në luftën kundër korrupsionit.

Në fjalën e tij, z. Adriatik Llalla, Inspektor i Përgjithshëm i ILDKP-së, njohu rëndësinë e organizatave vendore dhe të medias në promovimin e transparencës dhe të përgjegjshmërisë së zyrtarëve publikë.

Programi i USAID-it punon me gjykatat, institucionet mbikëqyrëse, siç është ILDKP-ja dhe organizatat monitoruese për të luftuar korrupsionin në sektorin publik në Shqipëri.