Foto nga: USAID/Shqipëri   Zyrtarë nga USAID-i, nga Departamenti i Shtetit dhe nga Zyra e Bashkëpunimit Ushtarak formuan një grup pune gjatë një seminari për të diskutuar mbi mënyrat se si organizatat e tyre mund të bashkëpunojnë në përmirësimin e kujdesit shëndetësor në Shqipëri.

Misioni i Sh.B.A.-së organizon një seminar për të përmirësuar Çështjet Civile-Ushtarake në Shqipëri

TIRANË, 12 mars 2009     Gjatë datave 11-12 mars 2009, Misioni i Sh.B.A.-së në Shqipëri organizoi një seminar dyditor për marrëdhëniet civile-ushtarake të Sh.B.A.-së në Tiranë. Misioni i Sh.B.A.-së në Shqipëri u përzgjodh si një vend fokus në mënyrë që të rrisë përqendrimin strategjik dhe të koordinojë burimet mes Agjencisë së Shteteve të Bashkura për Zhvillim Ndërkombëtar (USAID), Zyrës së Bashkëpunimit Ushtarak dhe Departamentit të Shtetit.

Në mbështetje të kësaj nisme, Misioni mikpriti zyrtarët drejtues dhe ekspertët nga Zyra Qendrore e USAID-it në Uashington, D.C., Zyra e Sekretarit të Mbrojtjes, si dhe nga Komanda e Shteteve të Bashkuara në Evropë me qendër në Shtutgart të Gjermanisë.

Në fjalimin e hapjes së seminarit, Ambasadori i Sh.B.A.-së, Xhon L. Uidhërs theksoi rëndësinë e përdorimit të burimeve, të ekspertizës dhe të talenteve të të gjitha agjencive dhe departamenteve që punojnë në Shqipëri për të maksimizuar plotësisht ndihmën tonë në Shqipëri gjatë viteve të ardhshëm.

Pjesëmarrësit në seminar identifikuan sektorët në të cilët mbivendosen objektivat e Departamentit të Mbrojtjes dhe të USAID-it dhe diskutuan mbi aktivitetet që mund të ndërmerren bashkarisht. U vendos që sektori shëndetësor në Shqipëri, ai i çarmatimit dhe sektori që mbulon fatkeqësitë natyrore dhe emergjencat mund të përfitojnë nga ky bashkëveprim ndërsektorial.

Përqasja e të “tërë qeverisë” për planifikimin dhe përmbushjen e zhvillimit, të mbrojtjes dhe të nismave diplomatike është një mjet drejt një përdorimi më efektiv të burimeve të Qeverisë së Sh.B.A.-së për të përmbushur qëllimet e politikës së jashtme.

Pas seminarit, Misioni i Sh.B.A.-së në Shqipëri dhe Departamenti i Mbrojtjes do të nënshkruajnë një Marrëveshje Mirëkuptimi që angazhon organizatat të vazhdojnë takimet dhe koordinimet me njëri-tjetrin për të parë ecurinë dhe përmbushjen e këtyre propozimeve fillestare, për të vlerësuar me tej ndikimin dhe suksesin e tyre, për të gjeneruar veprimtari  të përbashkëta në të ardhmen dhe për të bashkëpunuar më ngushtësisht në zhvillimin e planeve në nivel vendi.