Çelësi i Konkurrueshmërisë

Fjalimi i Oficerit të Programit të USAID-it, Z. David Tompson
Konferenca e ACIT-it: “Tregtia e Jashtme Shqiptare dhe Sfida e Konkurrueshmërisë”
Tiranë, 30 mars 2007

Ministër Ruli,
Të ftuar të nderuar,

Është një kënaqësi e madhe për mua të marr pjesë në këtë konferencë sot. Do të doja të përgëzoja Qendrën Shqiptare për Tregtinë Ndërkombëtare që ndërmori këtë nismë, që është një kontribut i rëndësishëm për zhvillimin ekonomik të Shqipërisë. Gjithashtu, jam i kënaqur të rikonfirmoj angazhimin e USAID-it për të promovuar rritje ekonomike të qëndrueshme dhe me bazë të gjerë dhe për të zvogëluar varfërinë në Shqipëri.

Sikurse e dimë, gjatë viteteve të fundit Shqipëria ka përjetuar rritje ekonomike domethënësë. Sektori privat ka rritur pjesën e tij të kontributit në GDP-në e vendit. Shqipëria është anëtare e Organizatës Botërore të Tregtisë dhe ka nënshkruar disa Marrëveshje të Tregtisë së Lirë. Gjithashtu, Shqipëria ka nënshkruar Marrëveshjen e Stabilizim Asociimit me Bashkimin Evropian, që do të ndikojë mbi tregtinë ndërkombëtare të Shqipërisë.

Ndërsa këto arritje janë mbresëlënëse, Shqipëria përballet ende me probleme që nuk mund të zgjidhen shpejt apo lehtë. Këto probleme mund të ndikojnë për keq në integrimin në strukturat Euro-Atlantike, si dhe në mirëqenien e vendit. Raporti i Tregtisë së Jashtme për vitin 2006, publikuar prej Qendrës Shqiptare për Tregtinë Ndërkombëtare, thekson nevojën e Shqipërisë që të merret me deficitin tregtar në rritje. Kryesore për përmirësimin e performancës do të jetë aftësia e ndërmarrjeve të vogla dhe të mesme për të konkurruar – në tregun e brendshëm dhe të jashtëm – në tregjet globalizuese në rritje.

Qeveria e Shteteve të Bashkuara, përmes USAID-it, po ndihmon Shqipërinë të adresojë nevojat përmes programit tonë të zhvillimit eknomik. Përveç sigurimit të mbështetjes financiare dhe teknike për Qendrën Shqiptare për Tregtinë Ndërkombëtare, USAID-i po zbaton projektin Zhvillimi i Ndërmarrjeve Shqiptare dhe Shërbimet e Tregjeve të Eksporteve. Këto dy aktitivitete ndihmojnë ndërmarrjet shqiptare të bëhen më konkurruese në tregjet e brendshme dhe të jashtme. Ato kontribuojnë në rritjen e qëndrueshme të ndërmarrjeve private në sektorët bujqësorë dhe jo-bujqësorë, në promovimin e eksporteve, në krijimin e vendeve të punës dhe në përmirësimin e të ardhurave për familje.

Rritja e prodhueshmërisë dhe përmirësimi i standardeve të cilësisë janë hapa të rëndësishëm që ndërmarrjet shqiptare mund të ndërmarrin për të konkurruar plotësisht në tregjet e hapura gjithnjë në rritje. Megjithëkëtë, për të përmirësuar me të vërtetë avantazhet konkurruese të këtyre kompanive, kërkohet drejtim vizionar, vullnet i qëndrueshëm politik dhe përpjekje të vazhdueshme si në sektorin publik, ashtu edhe në atë privat, që politikat tregtare të adaptohen dhe të  zbatohen në mënyrën më efektive dhe të duhur.

USAID-i është i përkushtuar të ndihmojë Shqipërinë të arrijë rritje të qëndrueshme ekonomike, dhe ne shpresojmë që kjo konference do të udhëheqë në veprime që mbështesin konkurrueshmërinë e ndërmarrjeve shqiptare.