Reforma e Prokurimeve Publike

Fjalimi i Drejtorit të Misionit të USAID-it, Eduard T. Landau
Tryeza e Rrumbullakët mbi Prokurimet me Gratë Afariste
12 mars 2007

Ju falenderoj për mundësinë që të ndodhem këtu këtë mëngjes. Jam në dijeni që sot do të keni një ditë të ngjeshur, prandaj më lejoni t’ju flas shkurt.

Ju ndoshta keni dëgjuar mbi Marrëveshjen e Pragut të Korporatës Sfida e Mijëvjeçarit që Agjencia e Shteteve të Bashkuara për Zhvillim Ndërkombëtar menaxhon në Shqipëri. Kjo marrëveshje dy-vjeçare, mes Shqipërisë dhe Shteteve të Bashkuara, ndihmon Shqipërinë në zvogëlimin e korrupsionit në tre zona të administratës publike – administrimin e tatimeve, prokurimet dhe regjistrimin e biznesit. Kjo është pjesë e programit të përgjithshëm të Qeverisë së Shteteve të Bashkuara për të nxitur rritjen ekonomike, forcimin e demokracisë dhe qeverisjes, dhe investimin në njerëz.

Ju që jeni pjesë e komunitetit të biznesit do të filloni të shihni dhe të prekni së shpejti përmirësime të ndjeshme nga projekti i Korporatës Sfida e Mijëvjeçarit. Këtë verë, Qeveria e Shqipërisë do të hapë dyert e një qendre kombëtare për regjistrimin e biznesit në Tiranë, që do t’u lejojë bizneseve të regjistrohen përmes një procesi administrativ në vetëm një ditë. Ju do të nisni të shihni gjithashtu një transparencë, paanësi dhe eficiencë më të lartë në sistemin tatimor.

Dhe, brenda pak muajve, Shqipëria do të ketë një sistem elektronik publik prokurimesh që përdor ‘fjalën e fundit’ të teknologjisë së informacionit. Plani i prokurimeve elektronike publike është në përputhje me Ligjin e ri të Prokurimeve dhe në pershtatje me standardet e BE-së. Ndërkohë, Agjencia e Prokurimeve Publike po u lejon më shumë ofertuesve akses falas në dokumentat e tenderimit në kohë reale (online).

Vitin e ardhshëm, kur prokurimi elektronik të jetë funksional, kompanitë shqiptare do të kenë në dispozicion të tyre një sistem që siguron aksesin më të madh të mundshëm në tendera për bizneset dhe publikun, dhe sistemin qeveritar më transparent e konkurues për caktimin e kontratës fituese. Ne presim që bizneset të përfitojnë menjëherë nga mundësitë e krijuara prej këtyre reformave.

Por, një sistem prokurimesh eficient, i drejtë dhe transparent kërkon që të dy, qeveria dhe bizneset të pajtohen me rregullat dhe të pranojnë konkurencën e drejtë. Nëse kjo reformë në prokurime do të ketë sukses, do të varet nga konsultimet me komunitetin e biznesit. Bizneset janë partnerë në këtë reformë, veçanërisht bizneset e drejtuara prej grave.

Me numrin në rritje të grave afariste që po hyjnë në një sektor privat në zhvillim, të përbërë nga ndërmarrje të vogla dhe të mesme – shumë prej të cilave aktualisht zotërohen prej grave – gratë përbëjnë një pjesë të rëndësishme të sektorit sipërmarës shqiptar. Ato po prodhojnë një pjesë më të madhe të të mirave dhe shërbimeve të qeverisë. Prandaj, gratë, kanë një rol të madh për të luajtur dhe, të mos harrojmë, një interes ekonomik që të sigurohen që reforma të prodhojë një proces që është i drejtë dhe transparent ndaj gjinive.

Kuadri i ri i prokurimeve është një hap drejt paanësisë. Ai inkurajon autoritetet kontraktuese të përfshijnë ndërmarrjet e vogla dhe të mesme në prokurimet publike. Ai siguron konkurencë dhe transparencë në kontraktimet e qeverisë.

Të gjithë ju që keni ardhur për të marrë pjesë në këtë diskutim sot, faleminderit.