Fjalimi: Përsosja e Harmonisë Fetare

Fjalimi i Drejtorit të Misionit të USAID-it, Z. Eduard T Landau
Ceremonia e mbylljes së Projektit “Përsosja e Vlerave të Harmonisë Fetare në Shqipëri”
Tiranë, 15 mars 2007

Të nderuar udhëheqës fetarë, të ftuar, zonja dhe zotërinj,

Jemi sot këtu për të festuar arritjet e Projektit të USAID-it “Përsosja e Vlerave të Harmonisë Fetare në Shqipëri”. Programi u zbatua në partneritet me World Learning dhe udhëheqësit fetarë në vend. Ky projekt është pjesë e programit të përgjithshëm të USAID-it që nxit rritjen ekonomike, forcon demokracinë dhe qeverisjen, dhe mbështet investimet në njerëz në Shqipëri. 

Sikurse përmendi Z. Kule, ky projekt ka pasur disa suksese të mëdha dhe ka mundur të përmbushë shumë në një periudhë të shkurtër kohe. Që nga fillimi i këtij projekti dy vjet e gjysëm më parë, ai ka mbështetur dhe plotësuar përpjekjet e komuniteteve fetare në Shqipëri për të zgjeruar mundësitë për dialog ndër-fetar.

Përmes këtij projekti, USAID-i siguroi mbështetje për disa nisma ndër-fetare të komuniteteve, ngriti pesë qendra ndër-fetare, organizoi kampe verore për të rinjtë, siguroi trajnime për zbutje konfliktesh për aktivistët fetarë, sponsorizoi disa tryeza të rrumbullakëta për median dhe kontribuoi në mënyrë aktive për përforcimin e vlerave ekzistuese të harmonisë fetare në Shqipëri.

Vetëm javën e shkuar, ne pamë udhëheqës fetarë të mblidhen së bashku në një simpozium për formimin e këshillit të parë ndër-fetar të Shqipërisë. Ne i përgëzojmë këto përpjekje për të rritur bashkëpunimin dhe mbështetur harmoninë mes komuniteteve të shumta fetare në Shqipëri.

Në të vërtetë, projekti filloi të ngrejë aktivitetet e sipërpërmendura mbi një bazë tashmë të fuqishme. Shqipëria është njohur dhe njihet si një vend ku njerëzit i kanë dhënë gjithnjë rëndësi mirëkuptimit dhe bashkëpunimit ndërmjet besimeve të ndryshme fetare. Ky mirëkuptim është tejet i rendësishëm për zhvillimin e përgjithshëm të shoqërisë, në paqe dhe pjesmarrjen aktive në çështjet rajonale dhe botërore.

Ne, si Amerikanë, kemi shijuar rezultatet e mirëkuptimit dhe harmonisë fetare në pjesën më të madhe të historisë sonë.Qeveria e Shteteve të Bashkuara është e kënaqur që ka pasur mundësinë të përforcojë strukturat e harmonisë fetare në Shqipëri. Dhe kemi besim që i gjithë populli shqiptar do të vazhdojë të luftojë për këtë qëllim.

Më lejoni ta përfundoj fjalimin tim me vlerësimin e arritjeve të projektit dhe të përgëzoj udhëheqësit fetarë dhe personelin e projektit për kontributet që ata kanë dhënë për këto suksese.