Fermerët në Tregje

Fjalimi i Drejtori të Misionit të USAID-it, Z. Eduard T. Landau
Seminari për Transferimin e Teknologjisë Bujqësore
Durrës, 3 maj 2007

Z. Ministër i Bujqësisë, Ushqimit dhe Mbrojtjes së Konsumatorit,
Të ftuar dhe pjesëmarrës të nderuar,

Është një kënaqësi e madhe t’ju uroj pjesëmarrjen në këtë seminar sot.

Ky seminar konfirmon angazhimin e vazhdueshëm të Qeverisë së Shteteve të Bashkuara dhe të popullit amerikan në mbështetje të sektorit bujqësor shqiptar, përmes programeve të asistencës së zhvillimit ekonomik që nxisin rritje ekonomike të qëndrueshme dhe me bazë të gjerë, si dhe uljen e varfërisë.

Përveç këtij qëllimi, aktivitetet e USAID-it punojnë për përforcimin e demokracisë dhe të shtetit të së drejtës dhe për përmirësimin e shërbimeve shoqërore që ndikojnë si në komunitet urbane, ashtu edhe në ato rurale.

Si ekspertë dhe profesionistë të fushës, ju të gjithë e dini tejet mirë rëndësinë e bujqësisë për ekonominë shqiptare. Ky sektor siguron të ardhurat bazë për afro 57 për qind të popullsisë dhe zë afërsisht 23 për qind të Prodhimit të Brendshëm Bruto.

Por, pavarësisht nga këto statistika, ekzistojnë ende shumë pak agrobiznese konkurruese, eksportet kanë mbetur shumë pas importeve dhe shumë prej fermave vazhdojnë të operojnë në nivel mbijetese.

Megjithëkëtë, ky sektor ka potencial të konsiderueshëm për të nxitur rritjen ekonomike, për të rritur të ardhurat dhe për të ulur varfërinë në zonat rurale.

Në fakt, fitimet e shpejta bujqësore mund të shpien në rritjen më të shpejtë të numrit të të punësuarve në fermë dhe jashtë saj dhe janë kanalet më të mira për sigurimin e rritjes ekonomike me bazë të gjerë për vendin.

Kjo do të thotë rritje e të ardhurave të fituara nga fermat individuale përmes rritjes së produktivitetit dhe rritjes së sasisë së produkteve dhe përmirësimit të eficiencës në përpunim dhe marketing. Sektori si i tërë duhet të përmbushë nevojat e brendshme dhe të rrisë eksportet.

Këto janë vetëm disa prej vështirësive me të cilat përballet ky sektor, dhe ndonëse sfiduese, mund të arrihen përmes përpjekjeve të bashkërenduara të sektorit publik dhe privat për forcimin e konkurrueshmërisë së prodhuesve dhe aftësive për hyrjen në tregje.

Elementi i parë, konkurrueshmëria, varet nga përmirësimi i produktivitetit. Dhe ky, mes te tjerash, është në varësi të arritshmërisë së teknologjisë më të mirë nga fermeri.

Në Shtetet e Bashkuara, rëndësia që i jepet krijimit të një sistemi përgjegjës, modern për transferimin e teknologjisë është çelësi për modernizimin e plotë të sektorit bujqësor amerikan dhe për arritjen e fitimeve të jashtëzakonshme në prodhimin bujqësor gjatë 50 viteve të fundit.

Forca e sistemit amerikan të transferimit të teknologjisë qëndron në marrëdheniet e forta mes kërkimit, këshillimit dhe arsimimit, të cilat janë të afta t’u përgjigjen kërkesave vazhdimisht të ndryshueshme të ekonomisë së tregut të hapur.

Dëshiroj të përgëzoj përpjekjet që ka bërë qeveria shqiptare dhe Ministri Gjana për ta bërë zhvillimin e qëndrueshem bujqësor një përparësi kombëtare.

Jam i kënaqur të shoh mes pjesëmarrësve të këtij seminari përfaqësues nga insitucionet dhe nga organizatat publike dhe private, veçanërisht praninë e vetë fermerëve. Shpresoj që ky seminar të shpjerë drejt një vizioni të përbashkët për sistemin e transferimit të teknologjisë në Shqipëri dhe në veprime konkrete praktike për ta përmbushur këtë vizion.

Kjo është një nga zonat e shumta që kërkon vëmendje për të përshpejtuar rritjen e sektorit bujqësor.

Faleminderit për pjesëmarrjen tuaj në këtë seminar dhe mbetem në pritje të rekomandimeve tuaja.